De ôfrûne tiid binne wy dwaande mei it foarmjen fan in nij bestjoer foar Pleatslik Belang. De petearen dy’t oant no ta fierd binne, jouwe ús fertrouwen dat in trochstart mooglik is. Dat is goed nijs foar Surhuzum.
De krekte ynfolling is noch net hielendal klear. Dêrom kinne wy op dit stuit noch gjin nammen bekendmeitsje. Yn de folgjende Grutte Gelf hoopje wy mear te fertellen oer it nije bestjoer en hoe’t Pleatslik Belang fierdergiet.
Dan meitsje wy ek de datum fan de ledegearkomste bekend. By de ledegearkomste wurdt de keazen namme foar de tunnel bekendmakke. Der is dus moai nijs op komst.
Hoe sit it mei de ôffalbakken?
Earder dit jier naam de learlingeried fan De Balkespringer kontakt op mei Pleatslik Belang. De learlingen fûnen dat der tefolle ôffal op en om it skoalplein lei. Mei help fan de gemeente is dêrom in nije ôffalbak pleatst. Op de foarkant komt alle moannen in oare kleurplaat fan in learling. De learlingen meitsje de bak alle wiken sels leech. In moai foarbyld fan hoe’t wy mei-inoar de omjouwing skjin hâlde kinne.
Wa makket de ôffalbakken leech?
Op de doarpsjûn fan 1 juny die bliken dat in grut part fan de oanwêzigen net wist hoe’t it leechmeitsjen fan ôffalbakken yn Surhuzum regele is. Faak wurdt tocht dat de gemeente alle bakken leechmakket, mar dat is net sa.
De gemeente makket allinnich de ôffalbakken yn it bûtengebiet leech. Foar de bakken binnen de doarpskearn is Pleatslik Belang ferantwurdlik. Jieren lyn stiene op ferskate plakken yn Surhuzum ôffalbakken. Frijwilligers dy’t yn de buert wennen, makken dizze bakken leech.
Yn de bakken kamen hieltyd faker pûdsjes mei hûnepoep telâne. De frijwilligers moasten dit ôffal yn de eigen kontener dwaan. Ferskate frijwilligers woenen dat op in stuit net mear dwaan. Dêr hawwe wy alle begryp foar. Doe’t der gjin frijwilligers mear wienen, hat de gemeente de bakken fuorthelle.
Doe’t it hertenkamp in skoft gjin behearders hie, krigen wy klachten oer folle ôffalbakken mei benammen hûnepoep. As bestjoer hawwe wy doe sels ûnderfûn wêrom’t frijwilligers dit wurk net mear dwaan woenen.
De ôfwaging fan Pleatslik Belang
Wy hawwe ek ûndersocht oft de MOA de bakken leechmeitsje koe. De kosten fûnen wy as bestjoer te heech. De jierlikse fergoeding fan de gemeente foar it opromjen fan swerfôffal giet yn Surhuzum nei SVS en DTS. Dizze ferieningen hâlde dêrfoar oprûmrûnten troch it doarp.
Dêrneist fûnen wy dat it skjin hâlden fan de iepenbiere romte net allinnich in taak fan Pleatslik Belang wêze kin. Ek fûnen wy it net fanselssprekkend dat ledenjild brûkt wurde soe om hûnepoep fan oaren op te romjen. Dat wie de ôfwaging dy’t wy doe makke hawwe.
De nije ôffalbak op it skoalplein lit sjen dat it wol kin as der goede ôfspraken binne. Foar eltse bak moat dúdlik wêze wa’t him leechmakket. Dêrom freegje wy hûnebesitters om pûdsjes mei hûnepoep mei nei hûs te nimmen om sa it doarp mei-inoar skjin te hâlden.
Freonlike groetnis, Pleatslik Belang
Foto: De learlingeried mei de nije ôffalbak.